బంగ్లా-లంక తొలి టెస్టు డ్రా

- రెండు సెంచరీలతో హక్‌ రికార్డు 
చిట్టాంగ్‌ : శ్రీలంకతో జరిగిన తొలి టెస్టును బంగ్లాదేశ్‌ క్రికెట్‌ జట్టు డ్రాగా ముగించింది. చివరి రోజు ఆటలో మోమినుల్‌ హక్‌ సెంచరీ (105) చేయగా, లిటాన్‌ దాస్‌ 94తో జట్టును అదుకున్నారు. దీంతో అదివారం ఆటముగిసే సరికి బంగ్లాదేశ్‌ రెండో ఇన్నింగ్స్‌లో 5 వికెట్ల నష్టానికి 307 పరుగులు చేసింది. మూడు వికెట్ల నష్టానికి 81 పరుగుల ఓవర్‌నైట్‌ స్కోరుతో అదివారం ఆటను ప్రారంభించిన బంగ్లాదేశ్‌ శ్రీలంక బౌలర్లు సమర్థవతంగా ఎదుర్కొంది. మ్యాచ్‌ను డ్రాగా ప్రకటించారు. ఈ టెస్టులో శ్రీలంక తన తొలి ఇన్నింగ్స్‌ను 9 వికెట్ల నష్టానికి 713 పరుగులు వద్ద డిక్లైర్డ్‌ చేసింది. బంగ్లాదేశ్‌ తన తొలి ఇన్నింగ్స్‌లో 513 పరుగులకు ఆలౌటయింది. హక్‌ 176 పరుగులు చేశాడు. ఈ టెస్టుతో రెండు ఇన్నింగ్స్‌ల్లోనూ సెంచరీలు చేసిన తొలి బంగ్లాదేశ్‌ క్రికెటర్‌గా హక్‌ రికార్డు నెలకొల్పాడు. రెండో టెస్టు ఈ నెల 8న ప్రారంభమవుతుంది.

2 పరుగుల కోసం 40 నిమిషాల బ్రేక్‌

సెంచూరియన్‌: 119 పరుగుల లక్ష్యం కోసం బరిలోకి దిగిన భారత్‌ విజయానికి మరో రెండు పరుగుల దూ రంలో అంపైర్లు లంచ్‌ విరామం ప్రకటించడం అందరినీ విస్మయానికి గురిచేసింది. అయితే వారు ఐసీసీ నిబంధనలను అనుసరించే బ్రేక్‌ ప్రకటించినా రెండు పరుగుల కోసం 40 నిమిషాలపాటు ఆటగాళ్లు, ప్రేక్షకులు వేచి చూడాల్సి వచ్చింది. కానీ కామెంటేటర్స్‌, క్రికెట్‌ నిపుణులు ఈ తీరుపై విమర్శలు గుప్పించారు.

దక్షిణాఫ్రికా ఇన్నింగ్స్‌ 32.2 ఓవర్లలోనే ముగియడంతో భారత జట్టు వెంటనే తమ ఇన్నింగ్స్‌ను ఆరంభించింది. ఆ తర్వాత 19 ఓవర్లలో భారత్‌ వికెట్‌ నష్టానికి 117 పరుగులు చేయగా రూల్స్‌ ప్రకారం అంపైర్లు మ్యాచ్‌ను ఆపారు. కానీ కేవలం 2 పరుగుల కోసం అంతసేపు విరామం ప్రకటించడం అందరినీ అసహనానికి గురి చేసింది. కెప్టెన్‌ కోహ్లీ కూడా అసంతృప్తితో క్రీజును వదిలాడు. ఇక ఈ ప్రహసనంపై సోషల్‌ మీడియాలో తెగ కామెంట్స్‌ వినిపించాయి.

ఐసిసి జట్టులో ఐదుగురికి చోటు

దుబాయ్‌ : అంతర్జాతీ క్రికెట్‌ కమిటీ (ఐసిసి) ఎంపిక చేసిన ఐసిసి అండర్‌-19 ప్రపంచకప్‌ జట్టులో ఐదుగురు భారత ఆటగాళ్లకు చోటు లభించింది. ఇటీవలే ముగిసిన ప్రపంచకప్‌లో భారత్‌ అద్భుత ప్రదర్శనతో ఆకట్టుకుంది. నాలుగోసారి ఈ కప్‌ను దక్కించుకుని రికార్డు నెలకొల్పింది. 12 మందితో ఐసిసి ప్రకటించిన జట్టుకు దక్షిణాఫ్రికాకు చెందిన ర్యానర్డ్‌ వాన్‌ టొండర్‌ కెప్టెన్‌గా ఎంపికయ్యాడు. భారత్‌ నుంచి జట్టు కెప్టెన్‌ పృథ్వీషా, బ్యాట్స్‌మెన్లు మంజోత్‌ కార్లా, సుభామ్‌ గిల్‌, స్పిన్పర్‌ అనుకుల్‌ రారు, ఫాస్ట్‌ బౌలర్‌ కమలేష్‌ నగర్కోటి ఎంపికయ్యారు.
ఐసిసి జట్టు : ఫృధ్వీ షా, మంజోత్‌ కార్లా, శుభమన్‌ గిల్‌ (భారత్‌), ఫిన్‌ అల్లెన్‌ (న్యూజిలాండ్‌), ర్యానర్డ్‌ వాన్‌ టొండర్‌ (కెప్టెన్‌), వాండిల్‌ మాక్యాతె (వికెట్‌ కీపర్‌) (దక్షిణాఫ్రికా), అనుకుల్‌ రారు, కమలేష్‌ నాగర్‌కోటి (భారత్‌), గెర్లాడ్‌ కోయిట్జీ (దక్షిణాఫ్రికా), కైయిస్‌ అహ్మద్‌ (అఫ్ఘనిస్తాన్‌), షహీన్‌ అఫ్రిది (పాకిస్తాన్‌), అలిక్‌ అతనజే (వెస్టిండీస్‌)

స్పిన్నర్లు చుట్టేశారు

- 118కే దక్షిణాఫ్రికా ఆలౌట్‌ 
- రెండో వన్డేలో 9 వికెట్లతో భారత్‌ విజయం 
- 2-0తో సిరీస్‌ ఆధిక్యం 
- చాహల్‌కు మ్యాన్‌ ఆఫ్‌ ది మ్యాచ్‌ 
- సొంత గడ్డపై సఫారీల అత్యల్ప స్కోరు 
- కోహ్లి సేన రికార్డు గెలుపు 
సెంచూరియన్‌ : దక్షిణాఫ్రికాతో ఆదివారం జరిగిన రెండో వన్డేలో భారత్‌ 9 వికెట్ల తేడాతో అలవోకగా విజయం సాధించింది. భారత స్పిన్‌ ద్వయం యుజవేంద్ర చాహల్‌, కుల్‌దీప్‌ యాదవ్‌ దెబ్బకు దక్షిణాఫ్రికా జట్టు 32.2 ఓవర్లలో కేవలం 118 పరుగులకే ఆలౌటయింది. సొంత గడ్డపై దక్షిణాఫ్రికాకు ఇదే వన్డేల్లో అత్యల్ప స్కోరు. 8.2 ఓవర్లలో 22 పరుగులకు 5 వికెట్లు సాధించిన చాహల్‌ తన కెరీర్‌లో అత్యుత్తమ గణాంకాలు నమోదు చేసుకున్నాడు. కుల్‌దీప్‌ యాదవ్‌ 6 ఓవర్లలో 20 ఓవర్లుకు మూడు వికెట్లు సాధించాడు. భువనేశ్వర్‌ కుమార్‌, జస్ప్రీత్‌ బుమ్రా ఒక్కొ వికెట్‌ సాధించారు.
దక్షిణాఫ్రికా విధించిన 118 పరుగుల లక్ష్యాన్ని భారత జట్టు ఒక్క వికెట్‌ను మాత్రమే కోల్పోయి 20.2 ఓవర్లలో అందుకుంది. ఓపెనర్‌ రోహిత్‌ శర్మ 15 పరుగులు (17 బంతుల్లో ఒక సిక్స్‌, రెండు ఫోర్లు) చేసి నాలుగో ఓవర్‌లో రబడ బౌలింగ్‌లో మోర్కల్‌కు క్యాచ్‌ ఇచ్చి అవుటయ్యాడు. శిఖర్‌ ధావన్‌ 51 పరుగులు (56 బంతుల్లో 9 ఫోర్లు), విరాట్‌ కోహ్లి 46 పరుగులు (50 బంతుల్లో ఒక సిక్స్‌, నాలుగు ఫోర్లు)తో నాటౌట్‌గా వున్నారు. ఈ విజయంతో 6 వన్డేల ఈ సిరీస్‌లో భారత్‌ 2-0తో ఆధిక్యంలో నిలిచింది. మూడో వన్డే ఈ నెల 7న కేప్‌టౌన్‌లో జరుగనుంది.
ఈ మ్యాచ్‌లో ముందుగా టాస్‌ గెలిచిన భారత్‌ దక్షి ణాఫ్రికాను బ్యాటింగ్‌కు ఆహ్వా నించింది. హషీమ్‌ అమ్లా (23 పరుగులు, 32 బంతుల్లో నాలుగు ఫోర్లు)ను తొలి వికెట్‌గా భువనేశ్వర్‌ పెవిలియన్‌కు పంపాడు. తరువాత జట్టు స్కోరు 51 పరుగుల వద్ద డికాక్‌ను (20 పరుగులు, 36 బంతుల్లో రెండు ఫోర్లు)ను చాహల్‌ పెవిలియన్‌ చేర్చాడు. ఇదే స్కోరు వద్ద కెప్టెన్‌ మార్క్రమ్‌ (8), డేవిడ్‌ మిల్లర్‌ (0)ను వికెట్లను దక్షిణాఫ్రికా కోల్పోయింది. దీంతో దక్షిణాఫ్రికా 51 పరుగులకు నాలుగు వికెట్లు కోల్పోయింది. ఈ దశలో జట్టును జెపి డుమిని, ఖేయా జొండో అదుకునే ప్రయత్నం చేశారు. ఈ జోడీ ఐదో వికెట్‌కు 48 పరుగులు జోడించారు. అయితే జట్టు స్కోరు 99 వద్ద జొండో (25 పరుగులు), 107 పరుగులు వద్ద డుమిని (25 పరుగులు)ను చాహల్‌ అవుట్‌ చేశాడు. తరువాత క్రిస్‌ మోరిస్‌ (14 పరుగులు), రబడ (1), తాహిర్‌ (0), మోర్కల్‌ (1) త్వరగా అవుట్‌ కావడంతో దక్షిణాఫ్రికా ఇన్నింగ్స్‌ ముగిసింది. తబ్రైజ్‌ షమ్సి (0) నాటౌట్‌గా వున్నాడు. దక్షిణాఫ్రికా చివరి మూడు వికెట్లను కేవలం 6 బంతుల్లోనే కోల్పోయింది.
సొంత గడ్డపై దక్షిణాఫ్రికాకు ఇదే వన్డేల్లో అత్యల్ప స్కోరు. 2009లో ఎలిజబెత్‌లో ఇంగ్లాండ్‌ చేతిలో 119 పరుగులకు ఆలౌటయింది. 8.2 ఓవర్లలో 22 పరుగులకు 5 వికెట్లు సాధించిన చాహల్‌ తన కెరీర్‌లో అత్యుత్తమ గణాంకాలు నమోదు చేసుకున్నాడు. కెరీర్‌్‌లో 19వ వన్డేలో ఆడిన చాహల్‌కు 5 వికెట్లు సాధించడం ఇదే మొదటిసారి. అలాగే దక్షిణాఫ్రికాలో ఈ ఘనత సాధించిన తొలి బౌలర్‌గా నిలిచాడు. గతంలో ఇమ్రాన్‌ తాహిర్‌ వెస్టిండీస్‌పై 28 పరుగులకు నాలుగు వికెట్లు సాధించిన రికార్డును చాహల్‌ అధిగమించాడు. దక్షిణాఫ్రికా ఇన్నింగ్స్‌ త్వరగా ముగియడంతో భారత్‌ చాలా ముందుగా బ్యాటింగ్‌కు దిగింది. రోహిత్‌ 15 పరుగులకే రనౌటైనా ధావన్‌-కోహ్లి జోడీ అజేయంగా లక్ష్యాన్ని చేధించింది. కాగా భారత్‌ విజయానికి మరో రెండు పరుగులు దూరంలో వుండగా నిబంధనల ప్రకారం అంపైర్లు లంచ్‌ బ్రేక్‌ ప్రకటించారు. లక్ష్యాన్ని 20.3 ఓవర్లలో అందుకున్న భారత్‌ కొత్త రికార్డును నెలకొల్పింది. దక్షిణాఫ్రికా గడ్డపై అత్యధిక బంతులు (177 బంతులు) మిగిలి వుండగానే విజయం సాధించిన జట్టుగా నిలిచింది. 2000లో కేప్‌టౌన్‌లో 153 బంతులు వుండగానే ఆస్ట్రేలియా విజయం సాధించిన రికార్డును భారత్‌ అదివారంతో ఆధిగమించింది.

జయహో 'యువ భారత' క్రికెట్‌ చాణక్య!

అతడే ఒకప్పుడు అపజయాలకు అడ్డుగోడ. ఇప్పుడు భవిష్యత్తు విజయాల నిర్మాత. అతడే ఒక సైన్యం. రేపటి స్టార్‌ క్రికెటర్లను చెక్కుతున్న జక్కన్న. అతడే ఒక ధైర్యం. ఇక ఏం జరగదులే అన్న స్థైర్యానిచ్చే శిక్షకుడు. అతను పైకొక సాధారణ క్రికెటర్‌. మైదానంలో మాత్రం అసాధారణ పోరాట యోధుడు. అప్పటి ఆ ఆటగాడే భవిష్యత్తు భారత క్రికెట్‌ చాణక్యుడు. నవ భారత యువ క్రికెటర్లను పరిపూర్ణులుగా తీర్చిదిద్దుతున్న స్థిత ప్రజ్ఞుడు. ఐసీసీ అండర్‌-19 వన్డే ప్రపంచకప్‌ను నాలుగోసారి దేశానికి అందించిన మేటి గురువు. అప్పటికీ.. ఇప్పటికీ..

మరెప్పటికీ ఆయన 'మిస్టర్‌ డిపెండబుల్‌'!

వెలకట్టలేని అనుభవం

మునుపటి తరం క్రికెటర్లలో పరిపూర్ణుడు ఎవరంటే వినిపించే పేర్లలో రాహుల్‌ ద్రవిడ్‌ పేరు ముందుంటుంది. ఆయనకున్న క్రికెట్‌ పరిజ్ఞానం అమోఘం. ఆ అనుభవం అపూర్వం.

ప్రపంచ క్రికెట్‌ను శాసించిన ఆస్ట్రేలియా, ఇంగ్లాండ్‌, దక్షిణాఫ్రికాలపై ఆయన ఆడిన ఇన్నింగ్స్‌లను మనం ఇప్పటికీ మరిచిపోలేం. విదేశాల్లో పేస్‌, బౌన్సీ పిచ్‌లపై టాప్‌ ఆర్డర్‌ కుప్పకూలిన ప్రతి సందర్భంలోనూ నేనున్నా! అంటూ క్రీజులో నిలిచారు. ఆత్మవిశ్వాసంతో పోరాడారు.

తన డిఫెన్స్‌తో ప్రత్యర్థి బౌలర్లను అసహనానికి గురిచేసేవారు. వారిని అలసిపోయేంత వరకు పరుగెత్తించి ఆపై తాను పరుగు మీద పరుగు సాధించి చివరికి అపజయాన్ని ఓడించేవారు. సంప్రదాయ క్రికెట్‌లో ద్రవిడ్‌కు తెలియని షాట్లు లేవంటే ఏ మాత్రం అతిశయోక్తి కాదు! గెలిస్తే పొంగిపోరు.

అపజయాలకు కుంగిపోరు. ఆటలో ఇవన్నీ సహజం అన్నట్టు ప్రశాంతంగా ఉండేవారు. ఆ గుణాలే ఇప్పుడు యువ భారత క్రికెటర్లను పరిపూర్ణంగా గుణాత్మకంగా తీర్చిదిద్దేందుకు ఉపయోగపడుతున్నాయి.

నియమాల్లో కఠినం

శిష్యులపై గురువుకు అవ్యాజమైన ప్రేమ ఉండాలి.

సరిదిద్దాల్సి వచ్చినప్పుడు దండన విధించేందుకూ వెనకాడొద్దు. అండర్‌-19, భారత్‌-ఏ కోచ్‌గా ద్రవిడ్‌ ఈ నిబంధనలను పక్కాగా అమలు చేస్తారని వినికిడి. పేలవమైన షాట్లు ఆడి ఔటైనప్పుడు ఆ పొరపాట్లను ఎలా సరిద్దుకోవాలో చెప్పేవారు. క్రమశిక్షణను ఉల్లంఘిస్తే మాత్రం అస్సలు సహించరు.

శిక్షణలో ఎంత సరదాగా వ్యవహరిస్తారో అవసరమైతే అంతే తీవ్రత ప్రదర్శిస్తారు. స్వేచ్ఛను సైతం అలాగే ఇస్తారు. అండర్‌-19 ప్రపంచకప్‌ జరుగుతున్న సమయంలోనే కుర్రాళ్లు ఐపీఎల్‌ వేలం గురించి ఆందోళన పడుతున్నప్పుడు హితోపదేశం చేశారు. 'మీరిప్పుడు చేస్తున్న పనిపై దృష్టి పెట్టండి.

వేలం గురించి అస్సలు ఆందోళన చెందకండి. ఇప్పుడు మీరు చక్కగా రాణిస్తే భవిష్యత్తులో ఇలాంటి ఐపీఎల్‌ వేలాలు మరెన్నో వస్తాయి' అని విడమర్చి చెప్పారు. వారి మనసు తేలిక చేశారు. ఇక ఆస్ట్రేలియాతో తుదిపోరుకు ముందు అనవసర విషయాలు తెలుసుకోకుండా, ఆర్భాట పడకుండా, ఆత్రుతకు లోనుకాకుండా ఉండేందుకు కుర్రాళ్ల చేత మొబైల్‌ ఫోన్లు స్విచాఫ్‌ చేయించారు.

వ్యక్తిత్వ వికాస గురువు

ఆటలో శిక్షణనిస్తేనే గురువు పని అయిపోదు. తన విద్యార్థిని మానసికంగా, శారీరకంగా దృఢంగా రూపొందించాల్సిన బాధ్యత ఆయనదే. ద్రవిడ్‌ దీన్ని తు.చ. తప్పకుండా పాటించారు.

ఒక మ్యాచ్‌లో కుర్రాళ్లు చేసే తప్పుల్ని క్షుణ్ణంగా పరిశీలించేవారు. ఆట ముగిసిన తర్వాత వారిని కూర్చోబెట్టి ఆ పొరపాట్లను ఎలా సరిదిద్దుకోవాలో విశ్లేషించి చెప్పేవారు. అలాగే ఆటకు మానసికంగా ఎలా సిద్ధమవ్వాలో వివరించేవారు. ఈ రోజు టీమిండియాలో సుస్థిర స్థానం సంపాదించుకున్న యువ ఆల్‌రౌండర్‌ హార్దిక్ పాండ్య..

ద్రవిడ్‌ చేతిలో పడ్డాకే మెరుగుయ్యాడు. పాండ్య సాధారణంగానే మైదానంలో కాస్త అతిగా భావోద్వేగాలు ప్రదర్శిస్తాడు. కొన్నిసార్లు పిచ్చి ప్రయోగాలు చేస్తుంటాడు. అయితే భారత్‌-ఏ జట్టు తరఫున ఆస్ట్రేలియాలో పర్యటించిన తర్వాత అతడి దృక్కోణమే మారిపోయింది.

వైవిధ్యంగా బంతులు వేస్తున్నాడు. బ్యాటుతో స్థిరంగా రాణిస్తున్నాడు. తీవ్ర భావోద్వేగాలను అదుపులోకి తెచ్చుకున్నాడు. ద్రవిడ్‌ వల్లే తన ఆటపై నియంత్రణ సాధించానని పాండ్యనే స్వయంగా ఎన్నో సార్లు మీడియాకు చెప్పాడు.

ఈ తరహాలోనే ద్రవిడ్‌ కుర్రాళ్లకు ఎంతో చక్కని శిక్షణ ఇచ్చారు.

గౌరవనీయుడు

ఈ ప్రపంచంలో క్రికెట్‌ ఆడే ఏ దేశానికి వెళ్లినా రాహుల్‌ ద్రవిడ్‌ను గౌరవించని వారు కనిపించరు. ఆస్ట్రేలియా, ఇంగ్లాండ్‌, దక్షిణాఫ్రికా వంటి దేశాల్లో ఈ సంఘటనలు మనకు కనిపిస్తాయి. అక్కడి ఆటగాళ్లు ద్రవిడ్‌ను చాలా గౌరవిస్తారు.

ఆయన సలహాలు పాటిస్తారు. తన ప్రశాంత చిత్తంతో.. వ్యవహార శైలితో.. వివాదాలకు దూరంగా ఉండే మనస్తత్వంతో ద్రవిడ్‌ అజాత శత్రువుగా అందరికీ మిత్రుడుగా మారారు.

బీసీసీఐ ద్రవిడ్‌ను అండర్‌-19 కోచ్‌గా ప్రకటించగానే దాయాది దేశం పాకిస్థాన్‌ మాజీ క్రికెటర్లు సైతం స్పందించారు. అలాంటి విశ్వసనీయ వ్యక్తులను యువ క్రికెటర్లకు శిక్షకులుగా నియమించాలని పీసీబీని డిమాండ్‌ చేశారు. ఇక అండర్‌-19 ప్రపంచకప్‌ సెమీస్‌లో టీమిండియా చేతిలో పాక్‌ చిత్తుగా ఓడిపోయినప్పుడు ఆ దేశ పౌరులు చేసిన వ్యాఖ్యలు ఎంతైనా హర్షణీయం. 'ద్రవిడ్‌ వంటి గురువు తమకు లేకపోవడంతోనే మా కుర్రాళ్లు ఓడిపోయారు' అని పాక్‌ అభిమానులు ట్విటర్‌లో పేర్కొన్నారు.

ఆదర్శనీయుడు

'నీ మిత్రులెవరో చెప్పు నువ్వెలాంటి వాడివో చెప్తా' అన్న నానుడిని ఎన్నోసార్లు వినే ఉంటాం. అలాగే ఎంచుకున్న గురువును బట్టి విద్యార్థి విజయవంతం అవుతాడో తేదో చెప్పొచ్చు! గురువు అన్నింటా ప్రతిభాశాలి అయ్యుండాలి. అంతులేని..

అవసరమైన విజ్ఞానాన్ని పంచాలి. విద్యార్థిని ప్రశంసిస్తూ మరింత బాగా ఆడేలా ప్రోత్సహించాలి. పొగడ్తలకు పొంగిపోకుండా అతివిశ్వాసం దరి చేరకుండా చూడాలి. వివాదాలకు దూరంగా ఉంటూ ఆదర్శనీయుడిగా ఉండాలి.

ఈ లక్షణాలన్నీ ద్రవిడ్‌కు ఉన్నాయి. పరస్పర విరుద్ధ ప్రయోజనాల అంశంలో తనపై ఒక్క విమర్శ వినిపించిందో లేదో వెంటనే దిల్లీ డేర్‌డెవిల్స్‌తో కోట్ల రూపాయల ఒప్పందాన్ని రద్దు చేసుకున్నారు. కేవలం కోచ్‌ పదవికే పరిమితమై ఆదర్శంగా నిలిచారు. తన గౌరవాన్ని మరింత పెంచుకున్నారు.

అందుకే ఇలాంటి గురువు దొరికిన పృథ్వీషా సారథ్యంలోని కుర్రాళ్లు అదృష్టవంతులనే చెప్పాలి! కెరీర్‌లో ఎన్నో విజయాలు, ప్రశంసలు, పురస్కారాలు దక్కించుకున్న ద్రవిడ్‌కు ప్రపంచకప్‌ అందుకోలేకపోయాననే లోటు ఉండేది! ఇప్పుడు కుర్రాళ్లు ఆ లోటు తీర్చేశారు. కాదు కాదు తీర్చేసేలా వారికి తర్ఫీదునిచ్చారు.

అందుకే ఈ విజయం గురువుగా ద్రవిడ్‌కు అంకితమని చెప్పడంలో అతిశయోక్తి లేదు!!

యంగిండియాకు బిసిసిఐ భారీ నజరానా

ముంబై: ఐసిసి అండర్‌-19 క్రికెట్‌ టోర్నీలో విశ్వ విజేతగా నిలిచిన భారత యువ జట్టుకు బీసిసిఐ భారీ నజరానా ప్రకటించింది. జట్టులోని ఒక్కో సభ్యుడికి రూ. 30 లక్షలు, కోచ్‌ రాహుల్‌ ద్రావిడ్‌కు రూ.50 లక్షలు ,సహాయ సిబ్బందిలోని ఒక్కొక్కరికి రూ. 20 లక్షలు అందిస్తున్నట్లు బిసిసిఐ ట్విట్టర్‌ ద్వారా వెల్లడించింది. సెమీ ఫైనల్లో పాక్‌పై విజయం సాధించిన అనంతరమే భారత యువ జట్టుకు నజరానా ప్రకటిస్తామని బిసిసిఐ ముందుగానే తెలిపింది.

కోహ్లి నుంచి రహానే నేర్చుకోవాలిః సౌరవ్‌

ప్రస్తుతం టీమిండియాలో ఉన్న ఆటగాళ్లందరిలోకీ రహానే క్లాస్ ప్లేయర్ అని టీమిండియా మాజీ కెప్టెన్ సౌరవ్ గంగూలీ అభిప్రాయపడ్డాడు. దక్షిణాఫ్రికాతో జరిగిన మొదటి వన్డేలో కోహ్లీ చేసిన శతకం విలువైనదే అయినప్పటికీ.. రహానే ఆడిన ఇన్నింగ్స్ ఇంకా విలువైనదని సౌరవ్ అన్నాడు.
`రహానేది చాలా సొగసైన బ్యాటింగ్‌. అతను ఆడుతున్నప్పుడు చూడడం బాగుంటుంది. అయితే అతను అర్థశతకాలను సెంచరీలుగా మలుచుకోవడంలో తడబడుతుంటాడు. సెంచరీలు ఎలా చేయాలో కోహ్లీని చూసి రహానే నేర్చుకోవాలి. కోహ్లీ ఒక్కసారి కుదురుకుంటే తప్పకుండా సెంచరీ చేస్తాడు. కోహ్లీ నుంచి సుదీర్ఘ ఇన్నింగ్స్‌లు ఎలా ఆడాలో రహానే నేర్చుకోవాల`ని గంగూలీ సూచించాడు.

అండర్‌-19 ప్రపంచకప్‌ విజేత భారత్‌

అండర్‌-19 ప్రపంచకప్‌ విజేత భారత్‌

మౌంట్‌ మంగనుయ్‌ : అండర్‌-19 ప్రపంచకప్‌లో యువ భారత్‌ చరిత్ర సృష్టించింది. నాలుగోసారి ప్రపంచకప్‌ టైటిల్‌ను గెలిచి పృథ్వీషా సేన రికార్డు సృష్టించింది. ఆస్ట్రేలియాతో జరిగిన ఫైనల్‌లో 8 వికెట్ల తేడాతో ఘన విజయం సాధించింది. ఈ టోర్నీలో ఓటమే ఎరగని రాహుల్‌ ద్రవిడ్‌ విద్యార్థులు తమ సత్తాను ప్రపంచానికి చాటారు.

తొలుత టాస్‌ గెలిచి బ్యాటింగ్‌ ఎంచుకున్న ఆసీస్‌ యువ భారత బౌలర్ల ధాటికి విలవిలలాడింది. 47.2 ఓవర్లలో ఆలౌట్‌ అయి 216 పరుగులు చేసింది. అనంతరం లక్ష్య ఛేదనకు దిగిన భారత కుర్రాళ్లు కేవలం 38.5 ఓవర్లలో 2 వికెట్లు మాత్రమే కోల్పోయి 220 పరుగులు చేశారు. మన్‌జోత్‌ కల్రా అద్భుతమైన శతకంతో భారత్‌కు విజయాన్ని అందించాడు.

అండర్‌-19 ప్రపంచకప్‌ చరిత్ర సృష్టిస్తారా

- టైటిల్‌కై ఆస్ట్రేలియాతో ఢీ
- ఉదయం 6.30 గం||ల నుంచి 
- అప్రతిహత విజోరుమీదున్న టీమిండియా యువజట్టు ప్రపంచకప్‌ టైటిల్‌ సాధిస్తుందనడంలో ఎటువంటి సందేహం లేదు. గ్రూప్‌ దశలో ముఖాముఖి తలపడి ఆసీస్‌ను 100 పరుగుల తేడాతో ఓడించింది. అంతేగాక టీమిండియా జట్టు విజయాలన్నీ భారీ విజయాలే... కోచ్‌ ద్రావిడ్‌ పర్యవేక్షణ... పృథ్వీ షా సారథ్యంలోని యువజట్టు టైటిల్‌ సాధించాలని కోరుకుంటూ...

మౌంట్‌ మౌఘనై (న్యూజిలాండ్‌) : అండర్‌-19 ప్రపంచకప్‌ ఫైనల్లో నేడు భారత యువజట్టు టైటిల్‌కై పటిష్టమైన ఆస్ట్రేలియాతో తలపడనుంది. గ్రూప్‌-బిలో ఆసీస్‌తో జరిగిన తొలిమ్యాచ్‌లో 100 పరుగుల తేడాతో టీమిండియా ఘన విజయం సాధించింది. ఆ జట్టు ఓపెనర్‌ ఎడ్వర్డ్‌ను నియంత్రిస్తే భారీ స్కోర్‌ సాధించే అవకాశం ఉండదు. టీమిండియా బ్యాటింగ్‌, బౌలింగ్‌, ఫీల్డింగ్‌ ఇలా... అన్ని విభాగాల్లోనూ పటిష్టంగా ఉంది.
22 రోజుల పాటుసాగిన యువ ప్రపంచకప్‌ పోరు నేటి ఫైనల్‌ మ్యాచ్‌తో ముగియనుంది. ఇప్పటికే మూడుసార్లు ట్రోఫీని గెలచుకున్న టీమిండియా గత టోర్నీలో ఫైనల్లో బోల్తా పడి ఈసారి ఎలాగైనా కప్‌ కైవసం చేసుకోవాలని పట్టుదలగా ఉంది. కోచ్‌ రాహుల్‌ ద్రావిడ్‌ పర్యవేక్షణలోని భారత్‌ జట్టు తన జైత్రయాత్రను ఫైనల్లో కూడా కొనసాగించి కప్‌ను సొంతం చేసుకునేందుకు కసరత్తులు చేస్తోంది. 2000లో మొహ్మద్‌ కైఫ్‌ సారథ్యంలో తొలిసారి ప్రపంచకప్‌ను ముద్దాడింది... అనంతరం 2008లో విరాట్‌ కోహ్లి సారథ్యంలో... 2012లో ఉన్ముక్త్‌ చంద్‌ కెప్టెన్సీలో భారత్‌ మరో రెండుసార్లు ప్రపంచకప్‌లను అందుకుంది.
అయితే అండర్‌-19 వరల్డ్‌ కప్‌ చరిత్రలో అత్యధికసార్లు ప్రపంచకప్‌లు గెలిచిన ఘనత భారత్‌-ఆసీస్‌లది. ఈ రెండు జట్లు తలా మూడేసిసార్లు ప్రపంచకప్‌లను గెలిచి సంయుక్తంగా అగ్రస్థానంలో ఉన్నాయి. ఫలితంగా ఈసారి ఏ జట్టు గెలిచినా కొత్త చరిత్ర లిఖిస్తుంది. బ్యాటింగ్‌, బౌలింగ్‌ విభాగాల్లో ఇరు జట్లు బలంగా ఉండటంతో మెగా పోరు రసవత్తరంగా సాగే అవకాశం ఉందనడంలో ఎటువంటి సందేహం లేదు. భారత బ్యాటింగ్‌ విభాగంలో సారథి పృథ్వీ షాతో పాటు ఓపెనర్‌ శుబ్‌మాన్‌ గిల్‌లు మంచి ఫామ్‌లో ఉన్నారు. మరొకవైపు మన్‌జోత్‌ కర్లా, అభిషేక్‌ శర్మలు కూడా బ్యాటింగ్‌లో సత్తా చాటుతున్నారు. ఇక భారత బౌలింగ్‌ విభాగంలో శివం మావి, కమలేష్‌ నాగర్‌కోటిలు తమ పేస్‌ బౌలింగ్‌తో దుమ్మురేపుతున్నారు. ఇక స్పిన్‌ విభాగంలో అనుకుల్‌ రారు జట్టు అవసరానికి తగ్గట్టు బౌలింగ్‌ చేస్తూ విజయాల్లో కీలక పాత్ర పోషిస్తున్నాడు. ఈ క్రమంలోనే భారత జట్టే టైటిల్‌ ఫేవరెట్‌గా బరిలోకి దిగుతుంది. మరి భారత యువ జట్టు వరల్డ్‌ కప్‌ గెలిచి కొత్త చరిత్ర సృష్టిస్తుందో లేదో చూడాలి.

శుభమన్‌ గిల్‌ రికార్డ్‌... 
ఫైనల్‌ పోరులో ఇద్దరు ఆటగాళ్లపై అందరి దృష్టి ఉంది. టీమిండియా తరఫున అద్భుత ఇన్నింగ్స్‌లు ఆడుతున్న శుభ్‌మన్‌ గిల్‌ ఒకడు. మరొకరు ఆస్ట్రేలియా జట్టు లెగ్‌స్పిన్నర్‌ లాయిడ్‌ పోప్‌. గిల్‌ అండర్‌-19 ప్రపంచకప్‌లో 170 సగటుతో విజృంభించి రికార్డు పరుగులు సాధిస్తున్నాడు. చివరి నాలుగు ఇన్నింగ్స్‌ల్లో 113.28 స్ట్రైక్‌రేట్‌తో 341 పరుగులు చేశాడు. అంతేగాక టాప్‌ స్కోరర్‌గా కూడా నిలిచాడు. రెండు మ్యాచుల్లో అతడు నాటౌట్‌గానే నిలవడం గమనార్హం. ఇక పాక్‌పై ఒకవైపు వికెట్లు పడుతున్నా 94 బంతుల్లోనే 102 పరుగులతో అజేయంగా నిలిచి తనకు తానే సాటి అని నిరూపించుకున్నాడు. మిగతా మ్యాచుల్లో 63, 90(నాటౌట్‌), 86తో నిలిచాడు. ఆస్ట్రేలియా జట్టులో లెగ్‌స్పిన్నర్‌ లాయిడ్‌ పోప్‌ ఆట ఆసక్తికరం. ఇంగ్లాండ్‌తో క్వార్టర్‌లో ఆసీస్‌ 127 పరుగులకే పరిమితమైంది. అయితే బౌలింగ్‌లో పోప్‌ 35 పరుగులిచ్చి 8 వికెట్లు తీసి ఇంగ్లాండ్‌ను 96కు కుప్పకూల్చాడు. టోర్నీలో ఇప్పటి వరకు 11 వికెట్లు తీశాడు. తుదిపోరులో ఇతడి ఆట కీలకం కానుంది.

రెండు జట్లూ సమవుజ్జీలే 
అండర్‌-19 ప్రపంచకప్‌లో భారత్‌, ఆస్ట్రేలియాలు దాదాపు సమవుజ్జీలే! కాస్త భారత్‌దే పైచేయి అయినప్పటికీ... ఈ రెండు జట్లు తలో మూడు సార్లు ప్రపంచకప్‌లను సొంతం చేసుకున్నాయి. 1988, 2002, 2010లో ఆసీస్‌ విశ్వవిజేతగా నిలిచిన జట్లలో స్ట్టువర్ట్‌ లా, జార్జ్‌ బెయిలీ, షాన్‌ మార్ష్‌ వంటి ఆటగాళ్లు ఆ టోర్నీల్లో ఆడారు. భారత్‌ 2000, 2008, 2012లో టైటిళ్ళు సాధించిన జట్టులో యువరాజ్‌ సింగ్‌, శిఖర్‌ ధావన్‌, విరాట్‌ కోహ్లీలు ఆ తర్వాత ప్రపంచ క్రికెట్‌లో తమదైన ముద్రవేసుకున్నారు. 2016లో వెస్టిండీస్‌ చేతితో తృటిలో ఓడిపోయింది కానీ లేదంటే టీమిండియా అప్పుడే నాలుగోసారి విజేతగా నిలిచేది.

భారతజట్టు : పృథ్వీషా (సారథి), శుభ్‌మన్‌ గిల్‌, మన్‌జోత్‌ కార్లా, హిమాన్షు రాణా, అభిషేక్‌ వర్మ, రియాన్‌ పరాగ్‌, హార్విక్‌ దేశారు, శివమ్‌ మావి, కమలేశ్‌ నాగర్‌ కోటి, ఇషాన్‌ పోరెల్‌, అనుకుల్‌ రారు, శివ సింగ్‌, ఆర్యన్‌ జుయల్‌, అర్షదీప్‌ సింగ్‌, పంకజ్‌ యాదవ్‌
ఆస్ట్రేలియా జట్టు : జేసన్‌ సంఘా (సారథి), విల్‌ సుథర్‌లాండ్‌, జేవియర్‌ బార్ట్‌లెట్‌, మ్యాక్స్‌ బ్రయంత్‌, జాక్‌ ఎడ్వర్డ్స్‌, జాక్‌ ఇవాన్స్‌, జరాడ్‌ ఫ్రీమ్యాన్‌, రేయాన్‌ హెడ్లీ, బక్సర్‌, నేథన్‌ మ్యాక్‌ స్వీనీ, జొనాథన్‌ మెర్లో, లాయిడ్‌ పోప్‌, పరమ్‌ ఉప్పల్‌, ఆస్టిన్‌ వా.

కోహ్లీ.. నీకు ధన్యవాదాలు

కోహ్లీ.. నీకు ధన్యవాదాలు

దిల్లీ: భారత క్రికెట్‌ జట్టు సారథి విరాట్‌ కోహ్లీకి అభిమానులు ధన్యవాదాలు తెలిపారు. ఎందుకో తెలిస్తే షాకవ్వడం మీ వంతు అవుతుంది. ఇంతకీ ఎందుకు అనేగా మీ సందేహం. రహానెకు దక్షిణాఫ్రికాతో జరిగిన టెస్టు సిరీస్‌లో మొదటి రెండు టెస్టులకు తుది జట్టులో చోటు కల్పించని కోహ్లీ.. తొలి వన్డేలోనే ఆడించడం పట్ల అభిమానులు సంతోషం వ్యక్తం చేశారు. అందుకే కోహ్లీకి ట్విటర్‌ వేదికగా ధన్యవాదాలు తెలిపారు.

అంతేకాదండోయ్‌ భవిష్యత్తులోనూ నాలుగో స్థానంలో రహానెను దించాలని, ఈ స్థానానికి అతడు సెట్‌ అవుతాడని సలహాలు కూడా ఇచ్చారు.

*రహానెకు అవకాశమిచ్చినందుకు ధన్యవాదాలు కెప్టెన్‌. అతని బ్యాటింగ్‌ చూసి మైమరచిపోయాను. నంబర్‌ 4లో బ్యాటింగ్‌కు వచ్చే నువ్వు ఇక ఆ స్థానాన్ని రహానె కోసం త్యాగం చెయ్యి.

* బ్రేక్‌ఫాస్ట్‌, లంచ్‌, డిన్నర్‌లో శతకాలను తినే కోహ్లీ.. రహానె పట్ల దయ చూపించాడు.

ఎట్టకేలకు ఇండియాకు 4వ స్థానంలో బ్యాటింగ్‌ కోసం బెంగ తీరిపోయింది.

* 2019 ప్రపంచకప్‌ ఇంగ్లాండ్‌లో జరగనుంది. దీన్ని దృష్టిలో ఉంచుకునే రహానెను దక్షిణాఫ్రికా సిరీస్‌కు ఎంపిక చేశారు. నంబర్‌ 4లో ఆడటంపైనే రహానె దృష్టి పెట్టాలి.

* రహానె స్థానంలో మనీశ్‌ పాండేను ఎంచుకోవడం సరైన నిర్ణయం కాదు. నాలుగో స్థానాన్ని రహానె మాత్రమే భర్తీ చేయగలడు.

* భారత్‌కు మంచి మిడిలార్డర్‌ కావాలంటే నాలుగో స్థానంలో రహానెను దింపాలి.

* రహానెను నుంచి జాలువారిన ఈ ఇన్నింగ్స్‌ చాలాకాలం గుర్తుండిపోతుంది.

డర్బన్‌లో దక్షిణాఫ్రికాతో జరిగిన తొలి వన్డేలో రహానె 79 పరుగులు చేసిన సంగతి తెలిసిందే. సిరీస్‌లో భాగంగా ఇరు జట్ల మధ్య రెండో వన్డే ఆదివారం సెంచూరియన్‌లో జరగనుంది.

కోహ్లీతో ఆడటాన్ని గౌరవంగా భావిస్తాను!

డర్బన్‌: ఆతిథ్య దక్షిణఫ్రికాతో నిన్న జరిగిన తొలి వన్డేలో కోహ్లీ ఇన్నింగ్స్‌ చూసిన వారు ఎవరైనా వావ్‌ అనకుండా ఉండరు. కళ్లు చెదిరే షాట్లతో ప్రత్యర్థులను సైతం అభిమానులుగా మార్చేసుకున్నాడు. సఫారీ బౌలర్‌ ఇమ్రాన్‌ తాహీర్‌.. కోహ్లీ ప్రదర్శన చూసి ఫిదా అయిపోయాడు. ఔటై పెవిలియన్‌కు వెళ్తున్న కోహ్లీని అభినందించకుండా ఉండలేకపోయాడు. ఫెలుక్వాయో బౌలింగ్‌లో 44.3వ ఓవర్‌ వద్ద విరాట్‌ కోహ్లీ(112, 119 బంతుల్లో) రబాడకు క్యాచ్‌ ఇచ్చి వెనుదిరిగాడు. అప్పటి వరకు కోహ్లీ ఇన్నింగ్స్‌ను ప్రత్యక్షంగా వీక్షించిన బౌలర్‌ ఇమ్రాన్‌ తాహీర్‌ పరిగెత్తుకుంటూ కోహ్లీ వద్దకు వచ్చి అభినందించాడు. ప్రస్తుతం ఈ ఫొటో సామాజిక మాధ్యమాల్లో వైరల్‌గా మారింది. అంతేకాదండోయ్‌ ఈ ఫొటోను తాహీర్‌ తన ట్విటర్‌ ద్వారా పంచుకున్నాడు. 'విరాట్‌ కోహ్లీతో కలిసి ఆడటం నాకు దక్కిన గౌరవం'గా భావిస్తున్నాను అని పేర్కొన్నాడు. ఇదే ఫొటోను పంచుకున్న ఐసీసీ 'స్పిరిట్‌ ఆఫ్‌ క్రికెట్‌' అని పేర్కొంది. ఐపీఎల్‌లో ఇమ్రాన్‌ తాహీర్‌ను చెన్నై సూపర్‌కింగ్స్‌ దక్కించుకున్న విషయం తెలిపిందే.

ఇక సిరీస్‌లో భాగంగా భారత్‌-దక్షిణాఫ్రికా మధ్య రెండో వన్డే ఈ ఆదివారం సెంచూరియన్‌లో జరగనుంది.